«Велотөн» («Velonotte») проекты 9 ел элек тарихчы Сергей Никитин инициативасы буенча эшләнгән. Акция дөньяның Мәскәү, Санкт-Петербург, Истамбул, Рим, Лондон һәм Нью-Йорк кебек иң эре мегаполисларында уза. Казандагы акцияне оештыручылар һәм анда катнашучылар да велотөннең Татарстан башкаласында матур традициягә әйләнер дип ышана.
Быел әлеге акциядә катнашучылар саны ике мәртәбә артыграк – 5 меңгә якын булды. Велосипедта йөрергә яратучылар ;Казанның атаклы урыннары аша уникаль маршрут буенча 35 километрга якын ара узды, шәһәрнең истәлекле урыннары турында лекцияләр тыңлады һәм Идел яры буенча таң каршы алды.
Велосипедчылар төркемен маршрутның буеннан-буена оператив хезмәт хезмәткәрләре озатып барды. Алар акцияне уздыру барышында барлык катнашучыларның иминлеген тәэмин итте.