Дебиторлык бурычы Россия Федерациясе субъектлары бюджетларының эчке керем чыганакларының берсе булып тора, администрацияләү һәм эшне оештыруның нәтиҗәлелеге төбәк һәм муниципаль берәмлекләр бюджетларының тулылануы белән бәйле.

Билгеләп үтелгәнчә, соңгы елларда федераль дәрәҗәдә бюджетларга керемнәр буенча дебиторлык бурычларын түләтү чараларының нәтиҗәлелеген арттыруга юнәлдерелгән хокукый базаны камилләштерү буенча шактый эш башкарылды. Һәм Идел буе федераль округы тикшерү-хисап органнарында үткәрелгән дебиторлык бурычларын анализлау буенча сораштыруы күрсәткәнчә, ул федераль округның барлык субъектларында да кими. Әмма бу тема элеккечә актуаль һәм ТХО эшчәнлегендә өстенлекле юнәлеш булып кала бирә, шул исәптән бюджет керемнәрен тулыландыруны тәэмин итүдә «ярдәм итү» механизмы буларак, ә булган проблемаларның кайберләре федераль һәм төбәк дәрәҗәләрендә хәл итүне таләп итә.

Семинарда билгеләнгән мәсьәләләр буенча Чувашия һәм Удмуртия республикаларының, Самара, Саратов һәм Оренбург өлкәләренең тикшерү-хисап палаталары вәкилләре үз фикерләре белән уртаклаштылар.

Татарстан Хисап палатасы аудиторы Александр Якупов шәрехләү тәртибендә үткәрелгән тикшерү чаралары һәм республикада керемнәр буенча дебиторлык бурычы белән идарә итү практикасы турында сөйләде.